Þú mikli læknir samdi ég nú á jólaföstu 2013 í anda Móður Teresu. Reglubæn Boðbera kærleikans var fyrirmynd mín eða innblástur. Hún er í íslenskri þýðingu í bókinni: Móðir Teresa: Friður í hjarta á bls. 64-65. Ég vil tileinka þessa bæn Hjálparstarfi kirkjunnar, djáknum, læknum og hjúkrunarfólki. Látum bænina verða okkar fyrsta verk að morgni áður en við höldum til daglegra verka okkar.
Þú mikli læknir í anda Móður Teresu.
Þú mikli læknir, Guð minn góður,
ég geng þann veg sem velur þú.
Ég krýp í bæn, í kyrrð er hljóður,
þú kemur til mín, styrkir trú.
Þú veitir kraft og kærleik virkan,
svo kemur allt sem þjóninn þarf
frá þér sem gáfa, gerir styrkan
í gæsku við þitt líknarstarf.
Ég bið þig þess að þú mig geri
í það verk hæfan er ég fer
og hugann skýran, hjartað veri
svo heilt af ástúð eins og ber.
Já, hendur mínar ljúfar leiddu
að líkna þeim sem mæta mér
með góðvild þinni, Guð, útbreiddu
þinn gæsku faðm móti öllum hér.
Guð, vek minn huga, vaktu í mér,
að verði ég þeim hjálp og stoð,
með smælingjunum stend ég, því mér
er skylda ljúf þín kærleiksboð.
Ég veit að allt er veitt af gæsku,
mín verðmæti eru gjöf frá þér.
Ég náðar þinnar nýt frá æsku,
hvern nýjan dag þú gefur mér.
Nem brott úr hjarta beiskju alla
og breiskleika, þú máttinn átt,
að barmi þínum höfði halla
ég – hlusta á þinn æðaslátt.
Lát hugarfar þitt hug minn móta
að heilshugar og fölskvalaust,
með góðu illt á bak að brjóta,
ég beri til þín allt mitt traust.
Guðm. G.
Guðmundur Guðmundsson 