Þessi sálmur er þýðing á sálmi einnig eftir Frostenson við lag eftir norska tónskáldið og organistann Trond Kverno. Ég naut þess að syngja passíu hans undir hans stjórn með litlum sönghóp sem starfaði í Lilli-Borg kirkju í Osló á föstudaginn langa 1988. Hér er annar blær, barnslegt stef sett við dæmisöguna um sáðmanninn. Málverkið er eftir van Gogh sem ég fékk tækifæri til að skoða í Amsterdam í haust.
Jesús sat í bátnum
og boðaði Guðs orð.
Fólkið var við vatnið
og vorsól skein um storð.
Börnin smíða báta
úr berki eða skel.
Jesús boðar orðið
og allir hlusta vel:
”Sáðmaðurinn fræjum
þá sáði yfir fold.
Sumt bar mikinn ávöxt,
það óx í góðri mold.
Annað féll á veginn
og varð að fugla mat.
Annað féll í grjóturð,
þar ekkert vaxið gat.
Sumt féll meðal þyrna
og það er horfið nú.
Hlustaðu á orðið,
svo ávöxt berir þú.“
Þýð. Guðm. G.
Guðmundur Guðmundsson 