Fjórar trúarlegar myndir mínar eru nú til sýnis í Glerárkirkju. Það má skoða þær þegar kirkjan er opin í Gallerí forkirkju þ.e. í forkirkjunni. Þetta er aðventu og jólasýning en tengir saman hátíðir kirkjunnar og tilraun að túlka trú við síbreytilegar aðstæður. Ég vann með þær djúpu tilfinningar sem hrærast með trúnni, gleði, angur, angist og þakklæti. Kannski ekki allt jólalegt en trúin er ekki flótti frá raunveruleikanum heldur ferðalag í raunveruleikanum eins og hann kemur fyrir með Guði. Mig langar til að birta þessar myndir hér, eina í einu, fyrir þá sem komast ekki á sýninguna og kannski vera hvatning til að skoða þær á staðnum ef fólk hefur tækifæri til. Þá væri það ánægjulegt ef einhverjir söfnuðir hefðu áhuga að fá þær til sýnis í safnaðarheimilum sínum og ég get vel verið með innlegg eða erindi um hugsanirnar sem fóru í gegnum hugann við sköpunarferlið sem hefur staðið yfir í nokkur ár.
Allar myndirnar byggja á eldri verkum listamanna sem hafa túlkað trúarleg viðfangsefni, Botticelli, El Greco, Chagall og Denis. Það er túlkun mín á meistaraverkum með breytingum til að setja þau í nútímalegt samhengi. Í forgrunni er biðjandi manneskja, kvenprestur, drengur í lopapeysu, sjálfsmynd í prestsskrúða, nunnurnar í reglu Teressu hér á Akureyri. Bæn og íhugun, tilbeiðsla tengir okkur við Guð og Guð tengist okkur í undrinu að fæðast inn í heim okkar. Byrjum á fyrstu myndinni eftir Botticelli, Fæðingin undursamlega.
Staðfærð kópía af meistaraverki: Fæðingin undursamlega, eftir Sandro Botticelli frá 1500.
Þema: Gleði og lofgjörð.
Myndin er olíumálverk á striga, hæð 105 og breidd 75 cm.
Frummyndin er frá síðmiðöldum þegar kristnin hafði hvað víðtækust áhrif í Evrópu. Botticelli er einn af þekktari málurum frá endurreisnartímanum en þessa mynd hafði hann á heimili sínu. Ég ímynda mér að hann hafi íhugað við myndina enda var á þessum tíma bæn- og íhugun sterkur þáttur í menningunni, Botticelli hefur verið talinn mýstíker. Myndlistin gegndi því hlutverki þegar ólæsi var mikil meðal almennings að segja biblíusögurnar í myndum.
Mín túlkun er með nokkrum breytingum og yfirskriftin önnur. Mynd Botticelli hefur alltaf vakið gleði hjá mér. Dans er þannig að hann kveikir á tilfinningaflóru. Dansandi englar á himni er gleðin sjálf og ég mátti til að breyta englunum hjá Botticelli í postulana tólf í konur af öllum þjóðernum. Það er að fagna fjölbreytileikanum. Svo er það heilög þrenning á þakinu. Vísa þar aðeins í Íkona Rublevs sem margir þekkja. Kvennaguðfræðingurinn La Cugna heldur því fram að hugtakið faðirinn eða móðirin eða foreldrið komi á undan Guði. Kristin trú fjallar þar af leiðandi um tengsl — milli himins og jarðar og manna á milli og við sköpunina.
Fæðingin undursamlega, jólaboðskapurinn er þetta undur kærleikans að Guð fæðist sem barn inn í þennan heim til að tengjast. Englarnir kvísla það í eyru okkar: Þér er frelsari fæddur. Og í forgrunni á öllum myndunum eru mannsekjur í bæn og tilbeiðslu. Þannig tengjumst við Guði og Guð tengist okkur í Jesú og heilögum anda: Hallelúja.
“Lofa þú Drottin, sála mín”
Sálm 103
Guðmundur Guðmundsson 